Takkarkvøða

Tykkum, sum á ymsan hátt heilsaðu mær á 30 ára starvsdegnum og gjørdi dagin fyri meg ógloymandi, takki eg hjartaliga

Gott summar øll somul

Bestu heilsanir

Monrad Kjelnæs

 

Posted in HAF

30 ára starvsdagur

Ísamband við at Monrad Kjelnæs hevur starvast á skrivstovu okkara i 30 ár verður móttøka í hølum felagsins á Tinghúsvegi 7

Fríggjadagin 1 juni frá 15-18

         Øll eru hjartaliga vælkomin

Posted in HAF

Nýggjur sáttmáli undirskrivaður

Arbeiðarafeløgini og Føroya Arbeiðsgevarafelag hava í kvøld gjørt semju um nýggjan sáttmála, sum m.a. merkir, at arbeiðsfólk fáa meiri løn, hægri viðbót fyri starvsaldur, ásetingar um órímiliga uppsøgn og sættu frívikuna. Vit fegnast um eina veruliga lønarhækking, og at feløgini hava betra sáttmálan á fleiri økjum, siga forfólkini í arbeiðarafeløgunum.

Í kvøld gjørdu arbeiðarafeløgini og arbeiðsgevarafelagið tvey ára semju um nýggjan sáttmála, sum fær gildi frá 1. mai. Grundlønin hækkar 6,55 kr. samanlangt fyri 2 ár. Í miðal hava arbeiðsfólk fingið eina lønarhækkan á 8,25 kr. Grundlønin verður frá 1. mei 128,94 kr og 132,24 kr frá 1. mei 2019.

Viðbøturnar fyri starvsaldur hækka eisini. Fyri 3 ára starvsaldur er hækkingin 1,25% upp í 2,5%, 5 ára starvsaldur hækkar til 3,5% , 7 ára starvaldur hækkar til 4%, 9 ára starvsaldurin hækkar til 5% og 11 ára starvsaldurin hækkar til 6,25%.

Vit eru ógvuliga fegin um at viðbøturnar fyri starvsaldurin hækka. Á henda hátt fáa vit styrkt tey, sum hava arbeitt leingi innan sítt øki. Hetta er ein lønarhækking, sum viðurkennir royndirnar og førleikarnar hjá fólki, og tað meta vit vera rætt. Eisini er týdningarmikið fyri okkum, at vit fáa eina skipan við starvsaldri, sum minnir um aðrar sáttmálar á arbeiðsmarknaðinum, vísa Arbeiðarafeløgini á.

Fyri eitt arbeiðsfólk, sum hevur hægsta starvsaldur, merkir semjan eina lønarhækkan á 18.400 kr um árið í 2019 í mun til verandi sáttmála, og tað er ikki heilt galið, siga forfólkini í arbeiðarafeløgunu.

Órímilig uppsøgn
Vit eru ótrúliga fegin um, at tað hevur eydnast okkum at fáa ásetingar um órímiliga uppsøgn við í sáttmálan. Eisini hevði tað týdning fyri okkum at hækka viðbótina fyri skiftivaktina, sigur Georg F. Hansen, sum er formaður í Føroya Arbeiðarafelag.

Feløgini hava í semjuni fingið ymsar ábøtur í sáttmálan. Eitt nú hava feløgini fingið rætt til sættu frívikuna, greiðari ásetingar um matarsteðgir, ásetingar um týdningin av upplæring, eftirútbúgving og skeið – og hvussu hetta verður samsýnt. Umframt hetta inniheldur semjan ymiskar aðrar ásetingar um eldrapolitikk.

Bussførarar og hotellsáttmálin
Umframt vanliga sáttmálan er eisini gjørd semja um bussførarasáttmálan og hotellsáttmálan. Í nýggja hotellsáttmálanum er tað serliga eftirlønin sum hækkar samsvarandi nýggju pensjónsskipanini, áseting er um tilkallivakt og um matarsteðg.

Arbeiðarafeløgini umboða uml. 6.500 løntakarar um alt landið.

Posted in HAF

Samráðingar 2018

SLIT Í SAMRÁÐINGUNUM

Klokkan 22:00 fríggjakvøldið slitnaði í samráðingunum millum arbeiðarafeløgini og arbeiðsgevarafelagið, og semingsstovnurin var boðsendur. Stóru stríðsspurningarnir vóru løn og ein áseting um órímiliga uppsøgn, sum arbeiðarafeløgini vildu hava í sáttmálan.

Arbeiðarafeløgini hava kravt eina lønarhækkan, sum ger, at eisini arbeiðsfólk fáa lut í søguligu góðu tíðunum sum eru. Eisini hevur vigað tungt hjá feløgunum at fáa eina áseting um órímiliga uppsøgn í sáttmálan.

Semingsstovunurin fer at hava fund við partarnar, og síðani frættist nærri um, nær veruliga semingsroyndin byrjar.

Semingsstovnurin hevur útsett eitt møguligt verkfall í eina viku.

Sáttmálin gekk upprunaliga út 1. mei, og síðani hevur sáttmálin verið longdur ímeðan samráðingarnar hava verið.

Hans Joensen, formaður í Havnar Arbeiðarafelag

Georg F. Hansen, formaður í Føroya Arbeiðarafelag

Jastrid W. Niclassen, forkvinna í Klaksvíkar Arbeiðskvinnufelag

Arthur Guðjonsson, formaður í klaksvíkar Arbeiðsmannafelag

Vigdis Johannesen, forkvinna í Havnar Arbeiðskvinnufelag

 

Posted in HAF

1 mai 2018

1 mai dagshald

Havnar Arbeiðarafelag skipar aftur í ár fyri 1 mai dagshaldi á Vaglinum og byrjar tiltakið  kl 15.00

Røðarar í ár verða Elin Sørensen nevndarlimur í Føroya Arbeiðarafelag, Absalon Hansen nevndarlimur í Klaksvíkar Arbeiðsmannafelag og Heðin Mortensen tinglimur fyri Javnaðarflokkin

Havnar Hornorkestur spælir.

Tulkatænasta luttekur við tulki

Aftaná eru øll hjartaliga vælkomin inn á gólvi í húsum felagsins á Tinghúsvegnum 7 til ein drekkamunn

Møti fjølment

Nevndin

Posted in HAF

Frídagar

Mikudagin 25. apríl er flaggdagur og hálvur frídagur. Verður arbeitt aftaná kl 12, skal lønast við dupultari normalløn.

Fríggjadagin 27. apríl er dýri biðidagur og heilur frídagur. Verður arbeitt, skal lønast við dupultari normalløn allan dagin.

Týsdagin 1 mai er arbeiðaradagur og heilur frídagur. Átrokandi arbeiði, sum verður gjørt, verður lønt við dupultari normalløn allan dagin.

Posted in HAF

1 Mai 2017

1 mai dagshald

Havnar Arbeiðarafelag skipar aftur í ár fyri 1 mai dagshaldi á Vaglinum og byrjar tiltakið  kl 15.00

Røðarar í ár verða Jørleif Kúrberg ferðaleiðari, Tóra við Keldu forkvinna í MBF og Kári Johansen arbeiðsmaður.

Havnar Hornorkestur spælir.

Tulkatænasta luttekur við tulki

Aftaná eru øll hjartaliga vælkomin inn á gólvi í húsum felagsins á Tinghúsvegnum 7 til ein drekkamunn

Møti fjølment

Nevndin

 

Posted in HAF

Ársaðalfundur 2017

 

Havnar Arbeiðarafelag

 

Ársaðalfundur felagsins verður

Leygardagin, tann 11. mars 2017, kl. 15:00

á Hotel Føroyum

 

Skrá fyri aðalfundin:

 

  1. Frágreiðing frá farna ári
  2. Framløga av roknskapi til góðkenningar
  3. Val av formanni: Tá ið freistin fyri uppstilling til val av formanni var út, var einki uppskot innkomið. Verandi formaður verður tí afturvaldur, uttan atkvøðugreiðslu
  4. Val av tveimum nevndarlimum: Fyri vali standa Sakaris Hansen og Heri Reynheim. Teir taka við afturvali. Harumframt stilla upp: Martin Petersen og John Ove Hansen
  5. Val av tiltakslimum
  6. Val av gannskoðara
  7. Uppskot um viðtøkubroyting: Uppskot er innkomið um at formaður felagsins í mesta lagi kann verða valdur í 4 fylgjandi valskeið, sum er 8 ár. Harumframt er uppskot um málsligar rættingar í viðtøkunum.
  8. Ymiskt

 

Við á fundinum verður Helgi Eidesgaard rithøvundur, sum kemur at greiða frá bókini Havnar Arbeiðsmannafelag 100 ár.

Eisini kemur umboð fyri Betri Pensión at greiða frá eftirlønarviðurskiftinum hjá limum felagsins.

Teknmálstulkur verður við á fundinum

Aftaná fundin verður døgurði.

Bussur koyrir úr Steinatúni 20 min.áðrenn fundin og oman aftaná døgurðan.

Møtið fjølment

 

 

Nevndin

Posted in HAF

Nevndarval lýsing 2017

Til limirnar

Á aðalfundinum 11 mars 2017 er formansval og nevndarval á skránni.

Sambært grein 22 í lóg felagsins skulu uppskot til formansvalevni vera nevndini í hendi áðrenn 1.januar 2017. Saman við uppskotinum skal vera váttan frá viðkomandi at hesin vil lata seg stilla upp, umframt váttan frá 15 stillarum, sum skrivliga vátta, at teir stiðja viðkomandi til formansvalevni. Stillararnir skulu uppfylla treytirnar i § 12 fyri at hava atkvøðurætt.

———————————————————————————————————

Uppskot til nevndarvalevni skulu vera nevndini í  hendi áðrenn 1.februar 2017. Saman við uppskotinum skal vera váttan frá viðkomandi, at hann vil lata seg stilla upp.

                                Skráin fyri aðalfundin verður lýst seinri.

                                                       Nevndin

Posted in HAF